Abşeronda Olimpiya Kompleksində Avropa Cüdo Birliyinin təşkilatçılığı ilə U-13 və U-15 yaş kateqoriyaları üzrə Avropa Cüdo Ümidləri turniri və kodokan mütəxəssislərinin iştirakı ilə təlim sessiyaları davam edir. 
Olimpnews.az xəbər verir ki, yarışlar zamanı Azərbaycan Cüdo Federasiyasının (ACF) idman direktoru və baş katibin müavini Kamran Talıbov turnirlə bağlı fikirlərini bildirib.  
Federasiya rəsmisi bildirib ki, bu turnirin əsas hədəflərindən biri də 13 və 15 yaşadək cüdoçular üçün nəzərdə tutulan kodokan seminarlarının keçirilməsidir:
“Turnir çərçivəsində təşkil olunan seminarlar texniki və taktiki hazırlığın artırılmasına yönəlib. Gənc idmançılar burada yalnız mübarizə aparmır, eyni zamanda yüksək səviyyəli mütəxəssislərdən təlim alırlar. Bu səbəbdən tədbirə yalnız yarış gözü ilə baxmaq doğru olmaz. "Avropa Cüdo Ümidləri" turniri yalnız yarış deyil, gənclər üçün idman festivalıdır".
Kamran Talıbov həmçinin onu da qeyd edib ki, belə formatda tədbirlər dünya təcrübəsində də öz yerini tapıb və bu təşəbbüs Azərbaycanda da uğurla həyata keçirilir:
“Daha öncə digər ölkələrdə bu cür seminarlar və turnirlər keçirilib. Hazırda turnirə Yaponiya və Serbiyadan dəvət olunmuş mütəxəssislərlə yanaşı, yerli təcrübəli cüdo nümayəndələri də qatılıb. Avropa Cüdo Birliyinin ekspertləri yarışın təşkili və idarə olunmasında birbaşa iştirak edirlər”.
Qeyd edək ki, Avropa Cüdo Birliyinin təşkilatçılığı ilə keçirilən “Avropa Cüdo Ümidləri” turniri iyulun 27-də başa çatacaq. 

View this post on Instagram

A post shared by Baki Tekstil Fabriki MMC (@btf.az)