Bakıda "Avropa Cüdo Ümidləri" turnirinin açılış mərasimi keçirilib - FOTO
Abşeron Olimpiya İdman Kompleksində Avropa Cüdo Birliyinin təşkilatçılığı və Azərbaycan Cüdo Federasiyasının dəstəyi ilə U-13 və U-15 yaş kateqoriyaları üzrə “Avropa Cüdo Ümidləri” turnirinin açılış mərasimi keçirilib.
Tədbirdə Avropa Cüdo Birliyinin idman komissarı Pavel Volek, Azərbaycan Cüdo Federasiyasının baş katibinin müavini və idman direktoru Kamran Talıbov, federasiya nümayəndələri yerli və xarici məşqçilər, eləcə də iştirakçı komandalar yer alıblar.
Mərasimdə çıxış edən Kamran Talıbov turnirin Azərbaycanda keçirilməsinin önəmini vurğulayaraq, bu cür yarışların gənc cüdoçuların praktiki bilik və təcrübələrinin artırılmasında mühüm rol oynadığını qeyd edib. O, göstərilən etimada görə Avropa Cüdo Birliyinin rəhbərliyinə təşəkkürünü bildirib.
Avropa Cüdo Birliyinin rəsmisi Pavel Volek çıxışında Azərbaycana göstərilən yüksək qonaqpərvərliyə görə təşəkkür edib. O, tədbirə qatılan beynəlxalq mütəxəssislərin dəvəti qəbul edərək Bakıya gəlmələrindən məmnunluğunu ifadə edib və turnir iştirakçılarına uğurlar arzulayıb.
Rəsmi çıxışlardan sonra Azərbaycan Respublikasının Dövlət Himni səsləndirilib və “Avropa Cüdo Ümidləri” turniri rəsmən açıq elan olunub.
