Qusarda güləşin dostluq körpüsü

Güləş

Bugün, 12:22

İyulun 27-dən avqustun 4-dək Qusar Olimpiya İdman Kompleksində AİJA-nın təşkilatçılığı ilə sərbəst güləş üzrə II beynəlxalq güləş düşərgəsi keçirilib.

Olimpnews.az xəbər verir ki, artıq ikinci dəfə təşkil olunan düşərgə yalnız idmançıların hazırlıq səviyyəsinin yüksəldilməsinə deyil, müxtəlif ölkələrin gənc güləşçiləri arasında təcrübə mübadiləsinin aparılmasına və dostluq münasibətlərinin möhkəmləndirilməsinə də xidmət edib. Təlim-məşq toplanışında Azərbaycanın müxtəlif bölgələrini təmsil edən yeniyetmə və gənc güləşçilərlə yanaşı, ABŞ, Özbəkistan və Avstriyadan olan 60 nəfərədək idmançı və məşqçi heyəti iştirak edib. Müxtəlif güləş məktəblərinin nümayəndələrinin eyni məkanda bir araya gəlməsi məşq prosesinə xüsusi rəng qatıb. Hər bir iştirakçı həm öz bacarıqlarını nümayiş etdirmək, həm də digər ölkələrin hazırlıq metodlarından faydalanmaq imkanı qazanıb. Düşərgənin əsas məqsədi beynəlxalq təcrübə mübadiləsini genişləndirmək, gənc güləşçilərin fiziki və texniki hazırlığını təkmilləşdirmək, eləcə də Azərbaycanla xarici ölkələr arasında idman və dostluq əlaqələrini daha da inkişaf etdirməkdən ibarət olub. Bu baxımdan Qusarda keçirilən toplanışın əhəmiyyəti təkcə məşq prosesi ilə məhdudlaşmayıb. Gənc idmançılar xalça üzərində rəqib, məşqdən kənarda isə dost kimi ünsiyyət quraraq bir-birlərinin mədəniyyətini və dünyagörüşünü daha yaxından tanımaq imkanı əldə ediblər. İştirakçılar gün ərzində üç dəfə məşq edərək qarşıdakı yarışlara hazırlıq səviyyələrini artırıblar. Gərgin məşq proqramı ilə yanaşı, istirahət günlərində müxtəlif əyləncəli tədbirlər də təşkil olunub. Bu fəaliyyətlər idmançıların asudə vaxtlarını səmərəli keçirməsinə, kollektiv daxilində ünsiyyətin və qarşılıqlı münasibətlərin möhkəmlənməsinə şərait yaradıb. Düşərgənin diqqətçəkən məqamlarından biri Azərbaycan və ABŞ güləşçiləri arasında forma hədiyyələrinin təqdim olunması olub. İdman formalarının qarşılıqlı hədiyyə edilməsi dostluq və həmrəyliyin rəmzinə çevrilib. Hazırlıq prosesinin sonunda isə Amerika və Azərbaycan güləşçiləri arasında dostluq görüşü keçirilib. Qeyd edək ki, tədbirin təşkilində AİJA-nın vitse-prezidenti Ramin Allahverdiyev, sərbəst güləş üzrə beynəlxalq dərəcəli hakim, Əməkdar məşqçi Xəyal Əliyev və Əməkdar məşqçi Ağadədə Allahverdiyev koordinator kimi fəaliyyət göstəriblər.