VII İslam Həmrəyliyi Oyunlarına ev sahibliyi edəcək ölkənin adına artıq aydınlıq gəlib. Bu barədə Azərbaycan Milli Olimpiya Komitəsinin vitse-prezidenti, İslam Həmrəyliyi İdman Assosiasiyasının (İSSA) ikinci vitse-prezidenti Çingiz Hüseynzadə Olimpnews.az saytına müsahibəsində məlumat verib.
MOK rəsmisinin sözlərinə görə, müvafiq qərar Ər-Riyad şəhərində keçirilən İslam Həmrəyliyi İdman Assosiasiyasının (İSSA) 14-cü Baş Assambleyasında qəbul edilib.
“Noyabrın 8-də təşkil olunan Baş Assambleyasında qərara alındı ki, növbəti – VII İslam Həmrəyliyi Oyunları 2029-cu ildə Malayziyada keçiriləcək. Bu Oyunlar müəyyən bir tsiklin finalı kimi dəyərləndirilir və Beynəlxalq Olimpiya Komitəsinin himayəsi altında baş tutacaq,” - deyə Çingiz Hüseynzadə qeyd edib.
Qeyd edək ki, hazırda VI İslam Həmrəyliyi Oyunları Səudiyyə Ərəbistanının paytaxtı Ər-Riyadda keçirilir.
