Veteranlar arasında minifutbol turnirinin qalibləri mükafatlandırılıb - FOTO

Olimpiya dünyası

08.05.2026, 17:30

Mayın 8-də Bakı Tennis Akademiyasında ümummilli lider Heydər Əliyevin anadan olmasının 103-cü ildönümünə həsr olunmuş idman veteranları, media və incəsənət nümayəndələri arasında minifutbol turnirinin açılış və final mərhələsi keçirilib.

Tədbirdə Gənclər və idman naziri Fərid Qayıbov, Milli Olimpiya Komitəsinin (MOK) vitse-prezidenti, Azərbaycan İdman Veteranları İctimai Birliyinin prezidenti Zemfira Meftaxetdinova, Futbol Veteranları İttifaqının sədri Oqtay Abdullayev, Olimpiya çempionları, idman veteranları və idman ictimaiyyətinin nümayəndələri iştirak ediblər.

Açılış mərasimində əvvəlcə ümummilli lider Heydər Əliyevin və şəhidlərin xatirəsi bir dəqiqəlik sükutla yad edilib, ardınca Azərbaycan Respublikasının Dövlət Himni səsləndirilib.

Tədbirdə çıxış edən Gənclər və idman naziri Fərid Qayıbov bildirib ki, ümummilli lider Heydər Əliyevin xatirəsinə həsr olunan silsilə tədbirlər ölkənin idman həyatında xüsusi yer tutur. Nazir veteranlar arasında keçirilən turnirin idman ənənələrinin qorunması baxımından əhəmiyyətini vurğulayıb.

Milli Olimpiya Komitəsinin vitse-prezidenti, Azərbaycan İdman Veteranları İctimai Birliyinin prezidenti Zemfira Meftaxetdinova qonaqları salamlayaraq turnirin yüksək təşkilatçılıq səviyyəsində keçirildiyini qeyd edib. O, turnirin əhəmiyyətindən danışaraq, yarış iştirakçılarına uğurlar arzulayıb.

Futbol Veteranları İttifaqının sədri Oqtay Abdullayev isə veteran futbolçuların idmanda fəallığının qorunmasının vacibliyini diqqətə çatdırıb.

Çıxışlardan sonra bir qrup futbol veteranı fəxri fərmanlarla təltif ediliblər.

Bədii hissədən sonra final qarşılaşmasına start verilib. Həlledici oyunda “Qarabağ" və Azərbaycan milli komandasının veteran futbolçuları üz-üzə gəlib. Turnirin qalibi olan "Qarabağ" veteranları qızıl medal və kubokla təltif edilib. Azərbaycan millisi ikinci, "Neftçi" klubu isə üçüncü yerlə kifayətlənib.