“Qərbi Azərbaycanın idman tarixi” kitabının təqdimatı keçiriləcək

Olimpiya dünyası

Bugün, 20:07

Noyabrın 3-də “Qərbi Azərbaycanın idman tarixi” monoqrafiyasının təqdimat mərasimi keçiriləcək. Pedaqogika üzrə elmlər doktoru, professor Dilqəm Quliyevin müəllifi olduğu nəşr Qərbi Azərbaycanın bədən tərbiyəsi və idman tarixinin araşdırılmasına həsr olunub.

Olimpnews.az xəbər verir ki, monoqrafiya Prezident İlham Əliyevin 24 dekabr 2022-ci il tarixli müraciətinə töhfə və cavab olaraq hazırlanıb. Nəşrin ilk nüsxəsi Azərbaycan Respublikasının Prezidentinə göndərilib. Azərbaycan İdman Akademiyasının Elmi Şurasının 14 iyul 2023-cü il tarixli, 13 saylı protokolu ilə bəyənilən monoqrafiyanın təqdimatının keçirilməsi də məqsədəuyğun hesab edilib.

Kitabda Ümummilli Lider Heydər Əliyevin Qərbi Azərbaycanla bağlı fikirləri, fərman və sərəncamları, Prezident İlham Əliyevin rəhbərliyi ilə 44 günlük Vətən müharibəsində qazanılan tarixi Qələbə, dövlətin bədən tərbiyəsi və idman siyasəti, eləcə də Qərbi Azərbaycandan olan ziyalılarla görüşlər əksini tapıb.

Monoqrafiyanın əsas istiqamətlərindən birini Qərbi Azərbaycanın idman tarixi və bu bölgəni təmsil edən idmançıların beynəlxalq arenadakı nailiyyətləri təşkil edir. Nəşrdə Olimpiya oyunlarında, dünya və Avropa çempionatlarında, eləcə də digər beynəlxalq yarışlarda uğur qazanan 200-ə yaxın tanınmış idmançı haqqında məlumat verilir. Bununla yanaşı, bölgədə kütləvi idmanın inkişafı məsələlərinə də toxunulur.

Qərbi Azərbaycan idmançılarının tarixini geniş və sistemli şəkildə əhatə edən ilk nəşr kimi təqdim olunan monoqrafiya yerli və xarici ədəbiyyatların, o cümlədən ingilis, rus, alman və fransız dillərində olan mənbələrin təhlili əsasında hazırlanıb. Müəllif mövcud tədqiqatları təkrarlamaqla kifayətlənməyib, araşdırma materiallarını zənginləşdirməyə çalışıb.

200 kompüter səhifəsindən ibarət olan kitab giriş, 8 fəsil və 37 yarımfəsli əhatə edir. Nəşrdə rus və ingilis dillərində xülasələr, həmçinin 206 adda istifadə olunmuş ədəbiyyatın siyahısı yer alıb.

Elmi-publisistik üslubda qələmə alınan monoqrafiya tarixi faktların təqdimatı ilə yanaşı, dözümlülük və tolerantlıq ideyalarını da ön plana çəkir.