IV Avropa Oyunlarının keçiriləcəyi şəhərinin adına aydınlıq gəlib.
"Olimpnews.az" xəbər verir ki, 2027-ci ildə təşkil olunacaq Avropa Oyunlarına Türkiyənin İstanbul şəhəri ev sahibliyi edəcək. Bu barədə İstanbul meri Əkrəm İmamoğlu Avropa Olimpiya Komitələrinin (AOK) keçirdiyi tədbirdə məlumat verib. O, Avropa Olimpiya Komitəsinin yarışı məhz bu şəhərə verdiyini açıqlayıb.
"Bu xəbəri 16 milyonluq İstanbul şəhəri ilə bölüşməkən çox məmnunam. Ölkə idmanı adına çox böyük tarixi hadisədir. Qısa zamanda İstanbul Böyükşəhər Bələdiyyəsi ilə birlikdə bu mötəbər idman tədbirinin ev sahibliyinə nail olduq. Beş dəfə Olimpiya Oyunlarına ev sahibliyi etmək istəyən İstanbul nəhayət, böyük bir idman tədbirini qəbul edəcək. Avropa Olimpiya Komitələrinin üzvlərinin qısa zaman ərzində keçirdiyi səsvermə nəticəsində İstanbul əsas namizəd göstərilirdi. Fürsətdən istifadə edib Avropa Olimpiya Komitələrinin rəhbəri Spiros Kapralosa minnədarlığımı bildirirəm. Əminəm ki, bu mötəbər yarışa uğurla ev sahibliyi etməklə, Oyunların tarixində yeni bir səhifə açacağıq", - deyə Əkrəm İmamoğlu qeyd edib.
Konfransda Avropa Oyunlarının 2028-ci ildə ABŞ-ın Los Anceles şəhərində keçiriləcək Olimpiya Oyunlarına müxtəlif idman növləri üzrə vəsiqə verəcəyi də bildirilib.
Xatırladaq ki, Avropa Oyunları ilk dəfə 2015-ci ildə Bakıda təşkil olunub. Mötəbər idman tədbirinə 2019-cu ildə Belarusun paytaxtı Minsk, ötən il isə Polşanın Krakov şəhəri ev sahibliyi edib.
