Dünya çempionatında 90-a yaxın ölkədən 600-dən çox cüdoçunun iştirak edəcəyi gözlənilir

Cüdo

16.07.2026, 12:56

"Bakıda keçiriləcək cüdo üzrə dünya çempionatında 80-90 ölkədən 600-dən çox idmançının iştirakı gözlənilir".

Olimpnews.az xəbər verir ki, bu barədə Azərbaycan Cüdo Federasiyasının icraçı vitse-prezidenti Rəşad Rəsullu dünya çempionatına həsr olunmuş mətbuat konfransında məlumat verib.

O bildirib ki, iştirakçı ölkələrin sayının Olimpiya Oyunları ilə müqayisədə az olmasının əsas səbəbi Beynəlxalq Cüdo Federasiyasının tətbiq etdiyi reytinq sistemidir.

"Qaydalara əsasən, dünya çempionatında yalnız böyüklər arasında dünya reytinqinin ilk 100-lüyündə, gənclər arasında isə ilk 16-lığında yer alan idmançılar mübarizə apara bilirlər. Bu səbəbdən yarışda iştirak edəcək ölkələrin sayı təxminən 80-90 olacaq. Bu qayda həm yarışların keyfiyyətinin yüksəldilməsi, həm də proqramın daha səmərəli təşkili məqsədilə bir neçə il əvvəl tətbiq edilib. Dünya çempionatında iştirak hüququ verən yekun reytinq Qazaxıstanda sentyabr ayında keçiriləcək "Böyük Dəbilqə" turnirindən sonra formalaşacaq və məhz həmin reytinq əsasında iştirakçılar müəyyənləşdiriləcək", - deyə Rəşad Rəsullu bildirib.

O, həmçinin təşkilatçı ölkə kimi Azərbaycanın müəyyən üstünlüklərə malik olduğunu vurğulayıb. Qeyd edib ki, ev sahibi statusuna görə reytinq məhdudiyyəti Azərbaycan komandasına tam şəkildə şamil edilmir. Əsasnaməyə əsasən, Azərbaycan həm kişilər, həm də qadınlar arasında ümumilikdə maksimum 9 idmançı ilə təmsil oluna bilər. Hər çəki dərəcəsində isə ən çox iki cüdoçunun çıxışına icazə verilir. Beynəlxalq Cüdo Federasiyası təşkilatçı ölkəyə əlavə iştirak yerləri üçün müraciət etmək imkanı da yaradır. Əlavə kvotalarla bağlı yekun qərarın sentyabrın ikinci yarısında açıqlanacağı gözlənilir", - deyə Rəşad Rəsullu qeyd edib.