Horadizdə şəhid mayor Elnur Əliyevin xatirəsinə həsr olunan güləş turniri keçirilib

Olimpiya dünyası

11.08.2026, 21:07

Füzuli rayonunun Horadiz şəhərində Aprel döyüşləri şəhidi, mayor Elnur Əliyevin 50 illik yubileyinə həsr olunmuş V Respublika turniri keçirilib.

Olimpnews.az xəbər verir ki, sərbəst güləş üzrə U-15 yaş kateqoriyasında keçirilən turnirdə 8 komandadan 80-dən çox yeniyetmə pəhləvan mübarizə aparıb.

Tədbirin əvvəlində Azərbaycan Respublikasının Dövlət Himni səsləndirilib, Vətən uğrunda canından keçən şəhidlərin əziz xatirəsi ehtiramla yad edilib. Çıxışlarda Aprel döyüşlərinin Azərbaycanın hərb tarixində mühüm mərhələ olduğu vurğulanıb, şəhid mayor Elnur Əliyevin göstərdiyi qəhrəmanlıqdan söz açılıb.

Gərgin və maraqlı idman mübarizəsinin yekununda fərqlənən güləşçilər diplom, medal və qiymətli hədiyyələrlə mükafatlandırılıblar. Mükafatların təqdim olunmasında şəhid mayor Elnur Əliyevin qardaşı, polkovnik Həmid Əliyev və onun oğlu Elxan Əlizadə də iştirak ediblər.

Yarışların idarə olunmasını Azərbaycan Güləş Federasiyasının hakimlər briqadası həyata keçirib. Turnirin keçirilməsi həm yeniyetmə güləşçilər üçün növbəti yarış təcrübəsi, həm də şəhid qəhrəmanın xatirəsinin gənc nəslə çatdırılması baxımından əhəmiyyət daşıyıb.

Yarışın informasiya dəstəyi “Olimpiya dünyası” qəzeti və “Olimpsport” jurnalı olub.

Qeyd edək ki, 1976-cı il avqustun 16-da Füzuli rayonunun Dədəli kəndində anadan olan Elnur Əliyev hərbçi kimi Azərbaycan Ordusunda xidmət edib. 2016-cı ilin Aprel döyüşləri zamanı əsgərlərinin həyatını xilas etmək üçün qumbaranın üzərinə atılaraq şəhid olub. Göstərdiyi igidliyə görə ölümündən sonra Azərbaycan Prezidenti İlham Əliyevin Sərəncamı ilə III dərəcəli “Vətənə xidmətə görə” ordeni ilə təltif edilib.