İrina Zaretska: “İnanıram ki, hər şey mənim üçün yaxşı sonluqla bitəcək”

Polşada təşkil olunan III Avropa Oyunları davam edir. Oyunlar çərçivəsində keçirilən karate yarışlarının ikinci günündə mübarizəyə başlayan idmançılarımıdan biri də İrina Zaretskadır. 68 kq çəki dərəcəsində qüvvəsini sınayan idmançımız ukraynalı Qalina Melniki və ermənistanlı Anita Makyana qalib gələrək yarımfinala yüksəlib. Titullu karateçimiz qrupdakı son görüşündə ispaniyalı İzabel Nyetoya qalib gəlib. İrina Zaretska keçirdiyi görüşlərlə bağlı jurnalistlərlə təəssüratlarını bölüşüb. "İştirak etdiyim bütün yarışlarda qızıl medal qazanmaq barədə düşünürəm. 2015-ci ildə Bakıda olduğu kimi, bu dəfə də Avropa Oyunlarının qalibi olmaq istəyirəm. Yarışa çox yaxşı başlamışam və qrupda keçirdiyim hər üç görüşdə qalib gəldim. Bu, uğurlu nəticədir. Ancaq davamını gətirmək istəyirəm. Bundan sonra məni yarımfinal və finalda iki prinsipial görüş gözləyir. İnanıram ki, hər şey mənim üçün yaxşı sonluqla bitəcək”, - deyə İ.Zaretska bildirib.