Çingiz Hüseynzadə: “Təhlükəsiz idmanla bağlı bütün problemlər daha operativ şəkildə araşdırılacaq”

Müsahibə

05.06.2026, 16:18

“Federasiyalarımızın yalnız bir neçəsində təhlükəsiz idman üzrə mütəxəssislər fəaliyyət göstərir. Digər federasiyalarda isə belə kadrlar yoxdur. Buna görə də onların hazırlanması istiqamətində xüsusi təlim proqramı həyata keçirdik”.

Bu sözləri Milli Olimpiya Komitəsinin (MOK) vitse-prezidenti Çingiz Hüseynzadə Milli İdman Federasiyaları üçün Təhlükəsiz İdman Proqramının yekunları ilə bağlı MOK-da keçirilən tədbirdə jurnalistlərə açıqlamasında deyib.

Çingiz Hüseynzadə bildirib ki, son illər dünya idmanında təhlükəsiz idman məsələləri xüsusi aktuallıq qazanıb və bu istiqamətdə Milli Olimpiya Komitəsi tərəfindən ardıcıl tədbirlər həyata keçirilir.

“Dünya idmanında son illər təhlükəsiz idman məsələləri xüsusi aktuallıq qazanıb. Milli Olimpiya Komitəsi də bu istiqamətdə ardıcıl fəaliyyət göstərir və son üç il ərzində beynəlxalq mütəxəssislərin iştirakı ilə bir sıra forumlar təşkil edib. Budəfəki tədbirimizin əsas məqsədi Azərbaycanda fəaliyyət göstərən Olimpiya idman növləri üzrə federasiyaları təhlükəsiz idman prosesinə daha fəal cəlb etmək və həmin qurumlarda bu sahə üzrə mütəxəssislərin hazırlanmasına dəstək vermək olub. Təlim iştirakçıları sertifikatlarla təltif olundular. İnanırıq ki, onlar gələcəkdə bilik və bacarıqlarını daha da artıraraq öz federasiyalarında idmanın təhlükəsizliyi ilə bağlı məsələlərin həllinə töhfə verəcəklər”, - deyə Çingiz Hüseynzadə bildirib.

MOK rəsmisi qeyd edib ki, federasiyalara dəstək məqsədilə MOK-un nəzdində xüsusi işçi qrupu yaradılıb. “İşçi qrupunun tərkibində Azərbaycan Ədalətli Oyunlar Komissiyasının sədri Xəzər İsayev, Atletlər Komissiyasının sədri Fəridə Əzizova və Azərbaycan Respublikasının Ailə, Qadın və Uşaq Problemləri üzrə Dövlət Komitəsinin nümayəndələri yer alıb. Bu qrup federasiyalarda yarana biləcək problemlərin həllinə köməklik göstərəcək. Hesab edirəm ki, bu mexanizm sayəsində təhlükəsiz idmanla bağlı hər hansı məsələni gizlətmək mümkün olmayacaq və bütün problemlər daha operativ şəkildə araşdırılacaq”, - deyə Çingiz Hüseynzadə qeyd edib.