Taleh Nəsibov: "Bizi dəstəkləyən azarkeşlərimizə təşəkkür edirəm"

$Taleh Nəsibov: \"Bizi dəstəkləyən azarkeşlərimizə təşəkkür edirəm\"$

Müsahibə

05.06.2026, 23:50

"Dövlətimizin başçısı tərəfindən komandamız üçün 1 milyon manat məbləğində mükafatın ayrılması bizi qürurlandırdı".

Bu sözləri Azərbaycan Minifutbol Federasiyasının İcraçı vitse-prezidenti Taleh Nəsibov Bratislavada keçirilən Avropa çempionatında qazanılan qələbə barədə jurnalistlərə müsahibəsində deyib.

O, çempionatın kifayət qədər çətin keçdiyini qeyd edib.

"Qrup mərhələsini birinci pillədə başa vurduğumuz üçün sonrakı mərhələlərdə güclü rəqiblərlə qarşılaşdıq. Buna baxmayaraq, futbolçularımız yarışa yüksək səviyyədə hazırlaşmışdılar. Təlim-məşq toplanışları və fiziki hazırlıq prosesi istədiyimiz səviyyədə idi. Slovakiyada yaşayan və Avropanın müxtəlif şəhərlərindən gələrək bizi dəstəkləyən azarkeşlərimizə təşəkkür edirəm. Onların dəstəyi futbolçular üçün böyük motivasiya mənbəyi oldu. Komandamız hər oyuna yalnız qələbə məqsədilə çıxırdı. Nəticədə ikiqat Avropa və birqat dünya çempionu kimi vətənə qayıtdıq. Prezident hər bir uğurumuzdan sonra bizi qəbul edir, öz dəstəyini əsirgəmir. Bu diqqət və qayğı futbolçular üçün hər zaman böyük motivasiya rolunu oynayır”, - deyə Taleh Nəsibov bildirib.