"Bakıda IV İslam Həmrəylik Oyunlarına hazırlıq işləri ilə bağlı bu gün olduqca səmərəli müzakirələr apardıq. Təşkilat Komitəsi bu sahədə xeyli iş görüb. İnanıram ki, bütün işlər uğurla və yüksək səviyyədə həyata keçiriləcək. Çünki ölkə rəhbərliyi də bu məsələdə fəal dəstək nümayiş etdirir. Düşünürəm ki, Azərbaycan məhz bu baxımdan Oyunlara ev sahibliyi üçün doğru seçimdir. Biz bu işin öhdəsindən gəlmək üçün kifayət qədər səriştəyə sahibik. Azərbaycan Prezidenti İlham Əliyevin və birinci xanım Mehriban Əliyevanın IV İslam Həmrəylik Oyunlarına hazırlıq məsələlərini diqqət mərkəzində saxlamalarından çox məmnunuq və buna görə minnətdarlığımızı bildiririk. Onların dəstəyi olmasa, hazırlıq işlərini yüksək səviyyədə təşkil edə bilmərik. Azərbaycandan arxayınlıqla qayıdacağıq. Çünki burada bütün işlərin plana uyğun olaraq yüksək səviyyədə aparıldığını müşahidə etdik".
Olimpnews.az saytının AzərTAC-a istinadən məlumatına görə, bu sözləri IV İslam Həmrəylik Oyunlarının başlamasına bir il qaldığı vaxtda – mayın 12-də bu mötəbər yarışa hazırlıq işlərini qiymətləndirmək məqsədilə İslam Həmrəylik İdman Federasiyasının (İSSF) Əlaqələndirmə Komissiyasının Bakıda keçirilən rəhbər işçilərinin toplantısının yekunları ilə bağlı təşkil olunan mətbuat konfransında İSSF-in birinci vitse-prezidenti, Əlaqələndirmə Komissiyasının sədri Hamad Kalkaba Malboum deyib.
Mətbuat konfransında, həmçinin Azərbaycanın gənclər və idman naziri, IV İslam Həmrəylik Oyunlarının icraçı direktoru Azad Rəhimov, Milli Olimpiya Komitəsinin vitse-prezidenti, İSSF-in ikinci vitse-prezidenti Çingiz Hüseynzadə, baş katibi Faysal Abdulaziz Al Nassar iştirak ediblər.
Tədbirdə İslam Həmrəylik Oyunları haqqında məlumat verən Azad Rəhimov Bakıda təşkil ediləcək bu mötəbər yarışın idman tədbiri olmaqla yanaşı, möhtəşəm mədəniyyət festivalına da çevriləcəyini bildirib. Nazir Təşkilat Komitəsinin təklifləri əsasında iştirakçı ölkələrin milli mədəniyyətlərinin nümayiş etdiriləcəyini də vurğulayıb.
Oyunların proqramına milli idman növü olan zorxananın da salındığını qeyd edən nazir deyib: "Zorxananın təbliği bizim üçün prioritet təşkil edir. Bu, çox məşhur idman növüdür. Bu idmanın İslam ölkələrinin bəzilərində məşhurluğu getdikcə artmaqdadır. Çalışacağıq ki, İslam Oyunlarında da ən cəlbedici fəndləri nümayiş etdirək”.
İslam Həmrəylik Oyunlarının yüksək səviyyədə keçirilməsi üçün Azərbaycanda möhtəşəm idman qurğularının olduğunu deyən Azad Rəhimov hər hansı yeni arenanın inşa edilməyəcəyini deyib. O, yarışlara ümumilikdə 8 min könüllünün cəlb edilməsinin planlaşdırıldığını vurğulayıb. Bildirib ki, Oyunlar çərçivəsində keçiriləcək futbol turnirində səkkiz ölkənin milli komandaları mübarizə aparacaq. Futbol yarışı böyüklər arasında keçiriləcək. İslam ölkələrində futbol çox məşhur idman növüdür. Biz də istərdik ki, futbola maraq daha da artsın. Bu yarışda hansı ölkələrin iştirak edəcəyi hələ dəqiq müəyyənləşməyib və seçim prosesi davam edir. Oyunlarda dörd kateqoriya üzrə paracüdo yarışlarının da keçiriləcəyini qeyd edən A.Rəhimov vurğulayıb ki, Azərbaycan ev sahibi olduğu üçün bütün idman növlərində təmsil ediləcək. Nazir yarışlara biletlərin dörd ay əvvəldən bütün idman mərkəzlərində satışa çıxarılacağını vurğulayıb.
Sonra IV İslam Həmrəylik Oyunlarının yeni loqosunun və brendinin təqdimatı olub, bu barədə videoçarx nümayış etdirilib.
Azərbaycanlı dizaynerlər qrupu tərəfindən hazırlanmış loqo özündə İslam ölkələrinin tarixi və mədəni irsini təcəssüm etdirir. Özündə əksər müsəlman ölkələrinə xas olan zəngin mədəni dəyərlərin mühüm hissələrindən olan xalçaçılıq ənənələrinin elementlərini də ehtiva edən brenddə xalça kombinasiyasındakı çalarlar, həmçinin Azərbaycanın bu sahədəki zəngin irsi də təqdim olunur. UNESCO-nun Ümumdünya İrs Siyahısına daxil edilmiş Qobustan qayaüstü rəsmlərindən ilham alınaraq hazırlanan bu elementlər idman növləri ilə yüksək səviyyədə uyğunlaşdırılıb və ideal vəhdət təşkil edir. Brend biletlərin və uniformaların üzərində əks olunacaq.
Diqqətə çatdırılıb ki, IV İslam Həmrəylik Oyunlarında təmsil olunacaq ölkələrin Milli Olimpiya komitələrinin nümayəndələrinin iştirakı ilə mayın 13-də toplantı keçiriləcək. Artıq 40-dək ölkədən 70-dən çox nümayəndə Bakıdadır. Onlar paytaxtımızla və buradakı idman qurğuları ilə tanış olacaqlar. İclasda Oyunlar zamanı təhlükəsizlik, akkreditasiya, nəqliyyat və digər məsələlər müzakirə olunacaq.
Qeyd edək ki, IV İslam Həmrəylik Oyunları gələn il mayın 12-22-də keçiriləcək.
jpg-1777272647.jpg)
jpg-1777273845.jpg)
