“Sabah” - tarixin 5-cisi, Dambrauskas ilkə imza atdı

Futbol

14.05.2026, 13:07

"Sabah"ın litvalı baş məşqçisi Valdas Dambrauskas Azərbaycanda "qızıl dubl" müəllifi olan ilk legioner mütəxəssis olub.

Peşəkar Futbol Liqasından Olimpnews.az-a verilən məlumata görə, Misli Premyer Liqasının qalibi adını mövsüm başa çatmadan təmin edən Bakı təmsilçisi Azərbaycan Kubokunun finalında "Zirə"yə qalib gəlib – 2:1.

İlk dəfə "qızıl dubl"a imza atan "Sabah" eyni mövsümdə Azərbaycan çempionatı və kubokunun qalibi adını qazanan 5-ci komanda kimi tarixə düşüb.

Əvvəlki mövsümlərdə 4 klub ümumilikdə 11 dəfə "qızıl dubl" gerçəkləşdirib. "Qarabağ" hamıdan çox – 6 dəfə (1993, 2014/2015, 2015/2016, 2016/2017, 2021/2022, 2023/2024) bunu bacarıb. "Neftçi"nn hesabında 3 (1995/1996, 2003/2004, 2012/2013) "qızıl dubl" var. "Sabah" kimi hərəyə bir dəfə belə uğura sevinən "Kəpəz" 1997/1998, "Xəzər Lənkəran" 2006/2007 mövsümündə hər iki titulu qazanıb.

Əvvəlki 11 belə uğura yerli baş məşqçilər imza atıb. Qurban Qurbanov 5 (2014/2015, 2015/2016, 2016/2017, 2021/2022, 2023/2024), Kazbek Tuayev (1995/1996, 2003/2004) və Ağasəlim Mircavadov (1993, 2006/2007) hərəyə iki, Mehman Allahverdiyev (1997/1998) və Böyükağa Hacıyev (2012/2013) bir dəfə rəhbərlik etdiyi komanda ilə buna nail olub.