İsveçrədə keçirilən velosiped idmanının şose növü üzrə U-23 yaş kateqoriyası və gənclər arasında Avropa çempionatı başa çatıb. Yarışın 3-cü günü Azərbaycan velosipedçiləri üçün tarixi nailiyyətlə yadda qalıb. Belə ki, gənc velosipedçimiz Elgün Əlizadə 41 ölkənin iştirakı ilə keçirilən qitə çempionatında 130 km məsafəyə qrup ötüşməsində çempion olmuş İtaliya idmançısına 9 saniyə uduzaraq (03:09:47) 12-ci yeri tutub. Qeyd edək ki, yürüşdə ümumilikdə 190 velosipedçi iştirak edib.
Avropa çempionatının gedişini izləyən Azərbaycan Velosiped İdmanı Federasiyasının baş katibi Fərhad Əliyev gənc idmançımızın çıxışını yüksək qiymətləndirib: "Elgün Əlizadənin inamlı çıxışı bizdə sabahımızın etibarlı əllərdə olmasına inam yaradır. Bu həm də onu göstərir ki, federasiya rəhbərliyi tərəfindən tətbiq edilən "Azərbaycanın İstedadli Velosipedçiləri Proqramı” artıq öz bəhrəsini verməkdədir. Ümid edirəm ki, Elgün Əlizadənin bu nəticəsi yığma komandamızın digər üzvləri üçün də böyük stimul olacaq”.
Qeyd edək ki, Avropa çempionatına U-23 yaş kateqoriyasında çıxış edən velosipedçilərin 173 km məsafəyə qrup ötüşməsi ilə yekun vurulub.
