Azərbaycan Tokio Olimpiadasında üçüncü bürünc medalını qazanıb. Komandamıza bürünc medalı yunan-Roma güləşçimiz Rafiq Hüseynov qazandırıb. 77 kq çəki dərəcəsində mübarizə aparan pəhləvanımız üçüncü yer uğrunda görüşdə ermənistanlı güləşçi Karapet Çalyana 4:1 hesabı ilə qalib gəlib.
Xatırladaq ki, Tokio Olimpiadasında mübarizəyə ötən gün başlayan R.Hüseynov 1/8 finalda isveçli Aleks Kessidisə qalib gəlib. O, 1/4 finalda Akjol Mahmudova (Qırğızıstan) məğlub olub. Rəqib idmançının finala qədər irəliləməsi R.Hüseynovun təsəlliverici görüşlərdə iştirak etməsinə imkan yaradıb. Güləşçimiz təsəlliverici görüşdə tunisli idmançı Lamjed Maafidən güclü olub.
Xatırladaq ki, Rafiq Hüseynovdan əvvəl Azərbaycana cüdoçumuz İrina Kindzerska (+78 kq) və boksçumuz Alfonso Dominges (81 kq) bürünc medallar qazandırmışdı.
