“Qarabağ” və “Neftçi” Misli Premyer Liqasına şərikli liderlik edir

“Qarabağ” və “Neftçi” Misli Premyer Liqasına şərikli liderlik edir

Futbol üzrə Azərbaycan Premyer Liqasında VI turun oyunları keçirilib. Turun açılış matçında "Turan Tovuz" evdə "Kəpəz"i qəbul edib. Tovuz şəhər stadionunda oynanılan Qərb derbisi meydan sahiblərinin 2:0 hesablı qələbəsi ilə başa çatıb. Tovuz təmsilçisindən hər iki qolu Runi Eva vurub. 39-cu dəqiqədə hesabı açan kamerunlu hücumçu 77-ci dəqiqədə penaltidən fərqlənməklə son nöqtəni qoyub. Turun növbəti oyun günündə "Neftçi" Qəbələdə eyniadlı komandanın qonağı olub. Qəbələ şəhər stadionunda oynanılan qarşılaşma paytaxt klubunun 2:1 hesablı əzmkar qələbəsi ilə başa çatıb. İlk qolu 31-ci dəqiqədə meydan sahiblərindən Ramon Maçado vurub. 46-cı dəqiqədə Ataa Caber hesabı bərabərləşdirib. 7 dəqiqə sonra yenidən səhnəyə çıxan israilli yarımmüdafiəçi özünün və komandasının 2-ci qoluna imza ataraq, yekun hesabı müəyyənləşdirib. 
Günün digər görüşündə "Zirə" komandası "ASCO Arena"da "Səbail"in qonağı olub. Görüş qartalların 2:1 hesablı qələbəsi ilə yekunlaşıb. Hesabı 5-ci dəqiqədə qonaqlardan Dmitrios Çantakias açıb. 13-cü dəqiqədə Ağabala Ramazanov sabiq komandasını cəzalandıraraq, tarazlığı bərpa edib. Görüşdə son nöqtəni isə 33-cü dəqiqədə Sertan Taşkın qoyub. 72-ci dəqiqədə "dənizçilər" azlıqda qalıblar. Tural Bayramlı 2-ci sarı vərəqəni alaraq, meydandan qovulub. 
Turun sonuncu oyun günündə daha iki qarşılaşma oynanılıb. Günün ilk matçında "Sumqayıt" "Şamaxı"nı qəbul edib. "Kapital Bank Arena"dakı qarşılaşma 1:1 hesabı ilə başa çatıb. Meydan sahiblərində 3-cü dəqiqədə Almir Aqanspahiç, qonaqlarda isə 45-ci dəqiqədə Bahadur Həziyev fərqlənib.
Tura "Qarabağ" "Sabah" oyunu ilə yekun vurulub. "Azersun Arena"dakı qarşılaşma meydan sahiblərinin 4:3 hesablı qələbəsi ilə başa çatıb. Görüşdə hesab 29-cu dəqiqədə açılıb. "Köhlən atlar"ın heyətində Musa Qurbanlı fərqlənib. 32-ci dəqiqədə Emmanuel Apeh bərabərlik qoluna imza atıb. 43-cü dəqiqədə "Sabah"ın müdafiəçisi Abdulaye Ba 2-ci sarı vərəqəni alaraq meydandan qovulub.
Son ölkə çempionu 2-ci yarıya daha fəal başlayıb. 51-ci dəqiqədə Elvin Cəfərquliyev növbəti dəfə rəqibi mərkəzə dəvət edib. 60-cı dəqiqədə “Sabah”ın futbolçusu Coy Lens Mikels fərqlənərək hesabı yenidən bərabərləşdirib. 67-ci dəqiqədə isə Aleksey Kaşuk meydan sahiblərini növbəti dəfə mərkəzə dəvət edib. Məğlub durumda olan “Qarabağ” klubu 83 və 90+3-cü dəqiqələrdə Ramil Şeydayevin dəqiq penalti zərbələri ilə yekunda meydandan qələbə ilə ayrılmağı bacarıb. Qeyd edək ki, 90+5-ci dəqiqədə "Sabah"ın baş məşqçisi Murad Musayev hakimə kəskin etiraz etdiyi üçün birbaşa qırmızı vərəqə alaraq meydandan qovulub.
Beləliklə, 6 turdan sonra rəqiblərindən bir oyun az keçirən "Qarabağ" xallarının sayını 15-ə yüksəldərək onunla eyni sayda xal toplayan "Neftçi" ilə birgə turnir cədvəlinə şərikli liderlik edir. 13 xala malik "Sabah" isə 3-cü sırada qərarlaşır. "Turan Tovuz" isə Qərb derbisindəki qələbə ilə xallarının sayını 10-a çatdıraraq “Zirə” ilə birgə 4-5-ci yerləri bölüşdürür.