2025-ci il Asiya Qış Oyunlarının yarış cədvəli təsdiqlənib

Olimpizm xəbərləri

04.03.2024, 10:03

Asiya Olimpiya Şurasının açıqladığı yarış cədvəlinə əsasən, 2025-ci il Asiya Qış Oyunları fevralın 7-14-də Çinin şimal-şərqindəki Harbin şəhərində keçiriləcək.

Oyunlarda altı idman növü üzrə 64 yarış təşkil olunacaq. Açılış mərasimindən iki gün öncə, fevralın 5-də kişilər və qadınlar arasında buz hokkeyi və körlinq yarışları başlayacaq. Altı idman növünə biatlon, körlinq, buz hokkeyi, konkisürmə, xizəksürmə və xizək alpinizmi daxildir.

Buz yarışları 1996-cı il Asiya Qış Oyunlarının mövcud məkanlarından istifadə etməklə Harbində, qar yarışları isə Harbindən 193 kilometr məsafədə yerləşən Yabulidə keçiriləcək.

Açılış və bağlanış mərasimləri Harbin Beynəlxalq Konfrans, Sərgi və İdman Mərkəzində baş tutacaq.

Yanvarın 11-də oyunların şüarı, emblemi və maskotları rəsmi olaraq təqdim edilib. Təşkilat komitəsindən verilən məlumata görə, tədbirə hazırlıq tam sürətlə davam edir, yarışların keçiriləcəyi yerlər və yardımçı obyektlər təmir olunur.

Regional oyunlar bundan öncə də iki dəfə Çində keçirilib. 1996-cı ildə Harbin, 2007-ci ildə isə Jilin əyalətləri oyunlara ev sahibliyi edib.