Cüdoçularımız Avropa çempionatında iştirak edəcəklər

Aprelin 25-27-də Xorvatiyanın paytaxtı Zaqrebdə cüdo üzrə böyüklər arasında Avropa çempionatı keçiriləcək.

Azərbaycan Cüdo Federasiyasının mətbuat xidmətindən verilən məlumata görə, komandamız yarışda qadınlar və kişilər arasında 9 çəki dərəsində 13 cüdoçu ilə təmsil olunacaq. Cüdoçularımız qitə çempionatında böyüklərdən ibarət yığmanın baş məşqçisi Riçard Trautman, böyük məşqçilər Elçin İsmayılov və Slavko Tekiç, qadınlardan ibarət yığmanın baş məşqçisi Rəşad Məmmədovun rəhbərliyi altında çıxış edəcək. Komandamız qadınların yarışında Leyla Əliyeva (-48 kq), Gültac Məmmədəliyeva, Aydan Vəliyeva (hər ikisi -52 kq) və Acelya Toprakla (-57 kq) təmsil olunacaq.

Kişilərin mübarizəsində isə Balabəy Ağayev, Turan Bayramov (-60 kq), Yaşar Nəcəfov (-66 kq), Hidayət Heydərov, Rəşid Məmmədəliyev ( hər ikisi -73 kq), Zelim Tçkayev (-81 kq), Murad Fətiyev, Elcan Hacıyev (hər ikisi-90 kq) və Zelim Kotsoyev (-100 kq) tatami üzərinə çıxacaq.

Xatırladaq ki, kişilərdən və qadınlardan ibarət milli komandanın cüdoçuları Avropa çempionatına hazırlıq məqsədilə Avstriya, Rusiya, Portuqaliya, Fransa, İspaniya, Çexiya, Özbəkistan, Yaponiya, Türkiyədə və dəfələrlə yerli təlim-məşq toplanışlarında iştirak ediblər.