Bu gün Paris-2024 Yay Olimpiya Oyunlarının açılış mərasimi keçiriləcək

Olimpizm xəbərləri

26.07.2024, 09:00

Bu gün Fransanın paytaxtı Parisdə XXXIII Yay Olimpiya Oyunlarının açılış mərasimi keçiriləcək. Bakı vaxtı ilə saat 22:30-da başlayacaq mərasim ilk dəfə olaraq stadiondan kənarda - Sena çayının ətrafında təşkil olunacaq. Belə ki, Sena çayı boyunca 6 kilometrlik marşrutda 12 bədii səhnə, Fransanın irsi, Paris, şəhərin abidələri və marşrut boyunca körpüləri nümayiş etdiriləcək. Bundan başqa, 10 min 500 idmançı qayıqlarla Sena çayı boyunca üzəcək. Açılış mərasimindəki paradda Azərbaycan komandasının bayraqdarları cüdoçu Gültac Məmmədəliyeva və boksçu Məhəmməd Abdullayev olacaq. Avqustun 11-dək davam edəcək Paris-2024 Yay Olimpiya Oyunlarında Azərbaycan komandası 15 idman növü üzrə 48 idmançı ilə 17 proqramda təmsil olunacaq. Qeyd edək ki, Yay Olimpiya Oyunları artıq üçüncü dəfədir ki, Parisdə keçirilir. Buna qədər isə Fransa paytaxtı 1900 və 1924-cü illərdə keçirilən olimpiadaya ev sahibliyi edib. Bir əsr sonra yenidən olimpiadaya ev sahibliyi edən Paris şəhərinə dünyanın 206 ölkəsindən 10 min 500-dən çox idmançı gəlib. Atletlər yarışda 32 idman növü üzrə 329 dəst medal uğrunda mübarizə aparacaq.