"Judo Club 2012"nin cüdoçuları Azərbaycan çempionatını 7 medalla başa vurdular

$\"Judo Club 2012\"nin cüdoçuları Azərbaycan çempionatını 7 medalla başa vurdular$

Olimpizm xəbərləri

30.11.2024, 20:09

Qadınlar və kişilər arasında keçirilən cüdo üzrə Azərbaycan çempionatının fərdi yarışlarına noyabrın 30-da yekun vurulub.

Bakı İdman Sarayında təşkil olunan ikinci yarış günündə final görüşlərindən əvvəl yubileylərini qeyd edən cüdo mütəxəssisləri - Fərhad Rəcəbli, Mövlud Mirəliyev, Natiq Bağırov, Əli Dəvrişov, Ruzbek Vəliyev, Faiq Ağayev və Sevda Qarayeva mükafatlandırılıblar.

Ardınca mərasimdə Azərbaycan Cüdo Federasiyası (ACF) İcraiyyə Komitəsinin üzvü, Azərbaycan Cüdo Veteranları Assosiasiyasının prezidenti Azər Əsgərova Beynəlxalq Cüdo Federasiyası tərəfindən 6-cı dan, ağ-qırmızı kəmər və sertifikatı təqdim olunub.

Qeyd edək ki, turnirin ikinci günündə qadınlar və kişilər arasında 7 çəki dərəcəsində 112 cüdoçu medallar uğrunda mübarizə aparıb. "Judo Club 2012"nin idmançıları fərdi yarışların son günündə 1 qızıl, 1 gümüş və 2 bürünc medal qazanıblar.

Komandamıza qızıl medalı -90 kq çəki dərəcəsində mübarizə aparan Murad Fətiyev qazandırıb. Bu çəki dərəcəsində qüvvəsini sınayan Aslan Kotsoyev gümüş medala sahib çıxıb.

Klubun digər üzvlərindən Məhərrəm İmamverdiyev (-81 kq) və Məmmədrza Hacızadə (-90 kq) isə bürünc medallara layiq görülüb.

Xatırladaq ki, "Judo Club 2012" klubunun üzvləri yarışın ilk günündə 2 qızıl və 1 bürünc medal qazanmışdı. Klubun heyətində Hüseyn Allahyarov (-60 kq) və Fidan Əlizadə (-63kq) qızıl, Leyla Atayeva (-63 kq) isə bürünc medala sahib çıxmışdı.

Beləliklə, "Judo Club 2012" klubu Azərbaycan çempionatını 3 qızıl, 1 gümüş və 3 bürünc medalla başa vuraraq ümumi komanda hesabında üçüncu yeri tutub.

Qeyd edək ki, "Azman Holdinq" və onun tərkibinə daxil olan "Mangal Steak House" restoranlar şəbəkəsinin də əsas sponsorlarından olan turnirin ümumi mükafat fondu bu il ilk dəfə olaraq 50 min manat təşkil edib.

Ölkə çempionatının fərdi yarışlarında paytaxt və bölgələri təmsil edən 60 klubdan 324 (254 kişi, 70 qadın) cüdoçu medallar uğrunda mübarizə aparıb.

Azərbaycan çempionatına sabahkomanda yarışları ilə yekun vurulacaq.