Dünya kuboku başladı

Dünya kuboku başladı

Milli Gimnastika Arenasında bədii gimnastika üzrə dünya kuboku yarışları start götürüb.
Mayın 9-dək davam edəcək kubok yarışları Tokio-2020 Yay Olimpiya Oyunlarına təsnifat xarakteri daşıyır.
Yarışın ilk iki günündə təsnifat mərhələləri baş tutacaq və çoxnövçülükdə ən yüksək xal toplamış 8 fərdi gimnast, həmçinin qrup komandaları final mərhələsinə adlayacaq. Yarışın sonuncu günü isə həlledici final mərhələsinin qalibləri müəyyənləşəcək.
Birinci yarış günündə fərdi gimnastlar halqa və top, qrup komandalar isə 5 topla proqramlarını təqdim edəcəklər.
Qeydiyyat siyahısına əsasən, kubok yarışlarında 35 ölkədən 61-i fərdi və 106-sı qrup komandasının (18 qrup) üzvü olmaqla 167 gimnast iştirak edir.
Azərbaycanı bu yarışda Yay Universiadasının gümüş medalçısı, İslam Həmrəyliyi Oyunlarının qalibi, Olimpiya Oyunlarına lisenziya qazanmış Zöhrə Ağamirova, gənclər arasında dünya çempionatının ikiqat mükafatçısı Arzu Cəlilova, eləcə də son Avropa çempionatının üçqat medalçısı, Olimpiya Oyunlarına lisenziya qazanmış qrup hərəkətləri komandası təmsil edir.
Ənənəyə uyğun olaraq, kubok yarışlarında ən çox icra xalını yığmış gimnast və qrup komandasına ənənəvi “AGF Trophy” kuboku təqdim olunacaq.

Dünya kuboku başladı Dünya kuboku başladı Dünya kuboku başladı