Ağırlıqqaldıranların Azərbaycan birinciliyi başa çatdı

Ağırlıqqaldıranların Azərbaycan birinciliyi başa çatdı

Oktyabrın 1-2-də Şüvəlan qəsəbəsində yerləşən Ağır Atletika Akademiyasının yarış zalında gənclər (20 və 23 yaşlı gənc oğlan və qızlar) arasında ağırlıqqaldırma üzrə Azərbaycan birinciliyi keçirilib. 
Yarışda ölkənin bütün regionlarından yüzə yaxın atlet iştirak edib. Çempionatın təşkilində məqsəd ağırlıqqaldırma idman növünün şəhər, rayon, qəsəbə və kəndlərdə təbliği və inkişafı, idmançıların ustalıq səviyyəsinin artırılması və təkmilləşdirilməsi, perspektivli ağırlıqqaldıranların müəyyənləşdirilməsi, texniki cəhətdən hazırlıqlı idmançıların yığma komandalara seçilməsindən ibarət olub. 
Yarışda müxtəlif çəki dərəcələri üzrə qalib və mükafatçıların adları müəyyənləşib. Qaliblər diplom və medallarla təltif olunublar.  
Qeyd edək ki, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədində törədilən genişmiqyaslı təxribatın qarşısı alınarkən Azərbaycan Silahlı Qüvvələrin çox sayda hərbi qulluqçusu şəhid olmuş, bu səbəbdən 15-16 sentyabr tarixlərində keçirilməsi nəzərdə tutulan gənclər arasında ağırlıqqaldırma üzrə Azərbaycan birinciliyi təxirə salınmışdı.