Taekvondoçularımızın Eyndhoven sınağı 7 medalla yadda qaldı 

Taekvondoçularımızın Eyndhoven sınağı 7 medalla yadda qaldı 

Eyndhoven şəhərində taekvondo üzrə açıq Niderland çempionatı keçirilib. 40-a qədər ölkədən 800 idmançının iştirak etdiyi G2 kateqoriyalı yarış Azərbaycan milli komandası üçün uğurlu alınıb. 
Kişilərdən ibarət yığmanın böyük məşqçisi Elnur Amanov, qadınlardan ibarət millinin baş məşqçisi Səbuhi Zülfüqarov və böyük məşqçisi Sənan Həşimovun rəhbərliyi altında 8 taekvondoçumuzdan 7-si fəxri kürsüyə yüksəlib. 
Yığmanın heyətində bütün rəqiblərinə qalib gələn Eltac Qafarov (74 kq), Taleh Süleymanov (87 kq) və Minayə Əkbərova (46 kq) qızıl medala sahib olub. Digər taekvondoçularımızdan Səyyad Dadaşov (54 kq), Sədri Həmidrza (58 kq), Xanoğlan Kərimov (63 kq) və Yaşar Məmmədli (68 kq) 3-cü yeri tutublar. 
Beləliklə, yığmamız açıq Niderland çempionatını 3 qızıl və 4 bürünc medalla başa vurub.