Bakıda keçirilən birinci Avropa Oyunlarının 10-cu ildönümü münasibətilə Olimpiya Hərəkatının təbliği və inkişafındakı fəaliyyətinə  görə Azərbaycan Milli Olimpiya Komitəsinin beynəlxalq proqramlar idarəsinin müdiri Mehman Kərimova  Beynəlxalq Olimpiya Komitəsi tərəfindən təbrik məktubu ünvanlanıb.

Olimpnews.az xəbər verir ki, Milli Olimpiya Komitələri ilə Əlaqələr, Olimpiya Həmrəyliyi və Olimpizm365 üzrə direktor Ceyms Mklodun ünvanladığı məktubda Mehman Kərimovun gənclərə ilham verməsini və Avropada Olimpiya dəyərlərinin təbliğində xüsusi rolunu vurğulayıb.
Məktubda qeyd olunub ki, Mehman Kərimovun rəhbərliyi ilə həyata keçirilən Olimpiya Dəyərlərinin Tədrisi Proqramı (OVEP) minlərlə azərbaycanlı tələbəyə Olimpiya təhsili qazandıraraq, gələcək nəslin həyatında silinməz iz qoyub.
Məktubda Mehman Kərimovun 2019-cu ildə Bakıda Rəqəmsal Kommunikasiya və sosial şəbəkələr üzrə seminarlar təşkil etməklə, milli şirkətlərə rəqəmsal təcrübənin inkişafında dəstək verməsi, xüsusən də Paris-2024 Yay Olimpiya Oyunlarından sonra bu sahədə beynəlxalq əməkdaşlığın güclənməsi sahəsindəki fəaliyyəti qeyd olunub.
Mklod məktubda həmçinin, Mehman Kərimovun Təhlükəsiz İdman sahəsində gördüyü işlərə və Beynəlxalq Olimpiya Komitəsinin təhlükəsizlik üzrə sertifikatını almasına da diqqət çəkib: “Müdafiə mexanizmlərinin hazırlanmasında və BOK-un təhlükəsizlik işçisi sertifikatının alınmasında özünü göstərən Təhlükəsiz idmana olan bağlılığınız idmançıların və Olimpiya cəmiyyətinin rifahına sadiqliyinizi nümayiş etdirir. Liderliyinizə və Olimpiya dəyərlərinin əsl səfiri olduğunuza görə təşəkkür edirəm. Ümid edirik ki, idmanla daha yaxşı bir dünya qurmağa töhfə verməyə davam edəcəksiniz”, - deyə məktubda bildirilib.
Qeyd edək ki, Mehman Kərimov Milli Olimpiya Komitəsinin beynəlxalq proqramlar idarəsinin müdiri kimi ölkəmizin Olimpiya Hərəkatının inkişafı sahəsində müxtəlif layihələrin həyata keçirilməsində fəal sürətdə çalışır. 
Mehman Kərimov müxtəlif beynəlxalq yarışlarda missya rəhbəri, Milli Paralimpiya Komitəsinin İdarə Heyətinin, MOK-un bir sıra komissiyalarının üzvü kimi fəaliyyət göstərib.
O, 2018-ci ildə “Olympic Moves – Azerbaijan” proqramının təşkilində səmərəli fəaliyyətinə görə Fəxri Fərmanla təltif olunub.
Mehman Kərimovun fəaliyyətində xüsusi yer tutan istiqamətlərdən biri də Olimpiya Mədəniyyəti və Təhsil Proqramıdır (OCEP).
Mehman Kərimov Azərbaycan Milli Olimpiya Komitəsinin təşəbbüsü ilə Bakı-2015  Avropa Oyunlarının 10 illik yubileyinə həsr olunmuş "Süni intellekt (AI) və İdmanda İnnovasiya" müsabiqəsinə və Beynəlxalq Olimpiya Komitəsinin “Təhlükəsizlik İdman üzrə İnspektor” proqramına üzv qəbul olub.