Azərbaycanın ilk peşəkar kontinental velosiped komandası "Synergy Baku” 2014-cü il mövsümündə sonuncu yarışında iştirak edir. Komandamız Çin turnesi çərçivəsində keçirilən daha bir yürüşdə - "Tour of Fuzhou”da mübarizə aparır.
3 mərhələli yarışda 17-si kontinental, 5-i isə milli olmaqla 22 kollektiv çıxış edir.
Beynəlxalq Velosipedçilər İttifaqının 2.2 kateqoriyasına malik yürüşdə bu gün 122 km-lik ilk mərhələyə yekun vurulub. Velosipedçilərimizin hamısı - Maksim Averin, Elçin Əsədov, Samir Cəbrayılov, Aleksandr Surutkoviç, Ənvər Asanov və İsmayıl İlyasov finişi mərhələ qalibi ilə eyni vaxtda keçən pelotonun içərisində olublar - 2 saat, 39 dəqiqə, 34 saniyə. Fotofinişə əsasən ən yüksək göstərici Maksim Averinə məxsusdur - o, 6-cı yeri tutub. 2-ci mərhələdə iştirakçılar 133 km məsafə qət etməlidirlər. Qeyd edək ki, şüarı "Davamlı gələcəyə doğru” olan "Synergy Group” ASC Azərbaycanın ilk peşəkar velokomandası "Synergy Baku Cycling Project”in baş sponsorudur.
