Azərbaycan Paris-2024-də daha bir medalı təmin etdi

Olimpizm xəbərləri

07.08.2024, 19:25

Paris-2024 Yay Olimpiya Oyunlarının taekvondo yarışlarında mübarizə aparan idmançımız Qaşım Maqomedov yarımfinal görüşünə çıxıb. 58 kq çəki dərəcəsində yer alan idmançımız finala gedən yolda italiyalı Vito Dellakvila ilə qarşılaşıb. Görüş taekvondoçumuzun qələbəsi ilə başa çatıb. Təmsilçimiz hər iki hissədə rəqibindən üstün olub - 9:4, 11:1. Beləliklə, idmançımız bu qələbə sayəsində finala vəsiqə qazanıb. Bu nəticədən sonra Qaşım Maqomedov ən azı gümüş medalı özü üçün təmin edib. Həlledici mərhələdə idmançımızın rəqibi ötən il Bakıda keçirilən dünya çempionatının qalibi, cənubi koreyalı Park Taejoon olacaq. Görüş Bakı vaxtı ilə saat 23:37-də başlayacaq.

İdmançımız daha əvvəl irlandiyalı Cek Uolleyə və ispaniyalı Adrian Visente qalib gəlib.

Qeyd edək ki, Paris-2024 Yay Olimpiya Oyunlarında komandamızın aktivində iki qızıl medal var. Hər iki medalı komandamıza cüdoçular Hidayət Heydərov (73 kq) və Zelim Kotsoyev (100 kq) qazandırıblar. Boksçu Alfonso Dominqes (92 kq) isə finala yüksəlməklə ən azı gümüş medalı təmin edib.

Paris-2024 Yay Olimpiya Oyunlarına avqustun 11-də yekun vurulacaq.