Qusarda Respublika Şahmat Olimpiadasına start verilib

Şahmat

03.08.2026, 16:35

Avqustun 3-də Qusar Rayon Olimpiya İdman Kompleksində 16 yaşadək yeniyetmələr arasında Respublika Şahmat Olimpiadasının açılış mərasimi keçirilib.

Olimpnews.az xəbər verir ki, mərasimdə çıxış edən Qusar Rayon İcra Hakimiyyətinin başçısı Sahil Məmmədxanov yarış iştirakçılarını salamlayaraq, belə turnirin rayonda keçirilməsinin əhəmiyyətini vurğulayıb. O, gənc şahmatçılara uğurlar arzulayaraq, yarışın yeni istedadların üzə çıxarılmasına töhfə verəcəyinə əminliyini ifadə edib.

Azərbaycan Şahmat Federasiyasının birinci vitse-prezidenti Faiq Həsənov çıxışında ölkədə şahmatın inkişafına göstərilən dövlət qayğısından danışıb. O, Respublika Şahmat Olimpiadasının yeniyetmə şahmatçıların təcrübəsinin artırılması və gələcək beynəlxalq uğurlara hazırlanması baxımından mühüm əhəmiyyət daşıdığını bildirib.

Yarışın baş hakimi Azər İbrahimov isə Olimpiadanın reqlamenti barədə iştirakçılara məlumat verib. O, yarışların beynəlxalq şahmat qaydalarına uyğun keçiriləcəyini və bütün görüşlərdə ədalətli mübarizənin təmin olunacağını diqqətə çatdırıb.

Qeyd edək ki, Respublika Şahmat Olimpiadası A və B qrupları üzrə keçirilir. A qrupunda 200, B qrupunda isə 126 şahmatçı mübarizə aparır. 11 turdan ibarət olan yarışa avqustun 11-də yekun vurulacaq.

Azər Əlizadə