Futbola həsr olunan ömür

Olimpiya dünyası

Bugün, 15:23

Azərbaycan futbolunun inkişafında zəhməti, təşkilatçılığı və məşqçilik fəaliyyəti ilə iz qoymuş şəxslərdən biri də Çingiz Yavər oğlu Həşimovdur. Ömrünün böyük hissəsini futbola, idmana və ictimai fəaliyyətə həsr edən Çingiz Həşimov uzun illər ərzində həm futbolçu, həm məşqçi, həm də idman təşkilatçısı kimi fəaliyyət göstərib.

Çingiz Həşimov 1946-cı il iyulun 11-də Masallı rayonunda anadan olub. Onun futbolda ilk addımları ötən əsrin 60-cı illərinə təsadüf edir. 1965-ci ildə Biləcəri DEPO-sunun “Lokomotiv” komandasında çıxış edən Çingiz Həşimov B divizionunda SSRİ birinciliyində mübarizə aparıb. Futbolçu kimi qazandığı təcrübə sonrakı illərdə onun məşqçilik və təşkilatçılıq fəaliyyətinin formalaşmasında mühüm rol oynayıb.

1969-cu ildə Masallı rayon İdman Komitəsinin sədri vəzifəsində çalışan Çingiz Həşimov idmanın rayon miqyasında inkişafına öz töhfələrini verib. 1970-ci ildə “Neftçi” futbol klubunun əvəzedicilər heyətində çıxış edib. 1973-cü ildə isə Özbəkistan SSRİ-nin Jizak rayon komandasının heyətində çempionluq sevinci yaşayıb.

Onun futbol karyerasında Zaqatalanın “Daşqın” və Lənkəranın “Xəzər” klublarında çıxış etdiyi illər də xüsusi yer tutur. 1979-cu ildə Zaqatalanın “Daşqın” komandası ilə SSRİ birinciliyində, 1980-ci ildə isə Lənkəranın “Xəzər” klubunun heyətində SSRİ birinciliyində mübarizə aparıb. 1983-cü ildə Masallının “Viləş” futbol klubunda məşqçi-futbolçu kimi fəaliyyət göstərib.

Çingiz Həşimov yalnız futbol meydanında deyil, idmanın təşkilati işlərində də fəallığı ilə seçilib. 1987-ci ildə “Məhsul” Kənd Könüllü İdman Cəmiyyətinin Masallı rayon şurasının sədri vəzifəsində çalışıb. Onun rəhbərliyi və iştirakı ilə rayonun müxtəlif idman tədbirlərinin keçirilib.

Çingiz Həşimovun idman fəaliyyətində Respublika “Sünbül” kubokunun üç dəfə sahibi olması da xüsusi qeyd edilməlidir. O, həmçinin ümumittifaq yarışlarında iştirak edib. İdman sahəsində uzunmüddətli və səmərəli fəaliyyətinə görə 2001-ci ildə “Azərbaycan Respublikasının Fəxri Bədən tərbiyəsi və idman işçisi” fəxri adına layiq görülüb.

Onun fəaliyyətinin mühüm istiqamətlərindən biri də gənc futbolçuların hazırlanması olub. Məşqçi kimi perspektivli futbolçuların yetişdirilməsində əməyi olan Çingiz Həşimov bir sıra istedadlı oyunçuların yetişmələrində xidmətləri olub. Onun yetirmələri arasında müxtəlif illərdə “Neftçi”, “Kəpəz”, “Şəmkir” futbol klublarında, eləcə də Azərbaycan milli komandasında çıxış etmiş futbolçular yer alıb. Şakir Abdullayev, Qəhrəman Əliyev, Alay Bəhramov, Aqşin Həşimov və Sahib Yusubov onun məşqçilik fəaliyyətinin yetirmələri sayılır.

Çingiz Həşimovun ictimai fəaliyyəti də onun həyat yolunun mühüm səhifələrindəndir. O, Masallı şəhər Xalq Deputatları Sovetinin deputatı kimi də fəaliyyət göstərərək, rayonun ictimai həyatında fəal iştirak edib.

Futbolçu, məşqçi və idman təşkilatçısı kimi fəaliyyət göstərən Çingiz Həşimov uzun illər Azərbaycan futbolunun inkişafına xidmət edib. Onun idman həyatında futbol xüsusi yer tutub. Karyerası ərzində qazandığı təcrübəni gənc futbolçularla bölüşməsi və onların yetişməsinə dəstək olması fəaliyyətinin əsas istiqamətlərindən biri olub.

Olimpnews.az saytı olaraq yubilyarla əlaqə saxlayıb, onun fikirlərini öyrəndik. Çingiz Həşimov 80 illik yubileyi ərəfəsində ölkəmizdə idmanın inkişafını yüksək qiymətləndirərək deyib:

“Ömrümün 80-ci ilində ölkəmizdə idmanın inkişafını, Olimpiya Hərəkatının və futbolun böyük sürətlə irəliləməsini görmək məni sevindirir. İnanıram ki, bundan sonra da istedadlı idmançıların yetişməsi, onların düzgün istiqamətləndirilməsi və göstərilən diqqət nəticəsində ölkəmiz daha böyük idman uğurlarına nail olacaq. Arzum budur ki, Azərbaycan idmanı bundan sonra da yeni-yeni nailiyyətlərlə xalqımızı sevindirsin.”

Çingiz Həşimovu Olimpnews.az saytı adından 80 illik yubileyi münasibətilə təbrik edir, ona möhkəm cansağlığı arzulayırıq.