Dünya çempionatı: Cüdoçularımız ikinci yarış gününü medalsız başa vurublar

Cüdo

Bugün, 14:25

Bakıda keçirilən cüdo üzrə dünya çempionatı davam edir.

Olimpnews.az xəbər verir ki, bu gün Azərbaycanın daha dörd cüdoçusu tatami üzərinə çıxıb. İkinci yarış günündə qadınlar arasında Gültac Məmmədəliyeva (-52 kq), kişilər arasında isə Turan Bayramov, Nizami İmranov və Ruslan Paşayev (hamısı -66 kq) qüvvələrini sınayıblar. Təmsilçilərimizdən Gültac Məmmədəliyeva 1/16 finalda İsrail təmsilçisi Gefen Primo ilə üz-üzə gəlib. Rəqibinə qalib gələn G.Məmmədəliyeva adını 1/8 finala yazdırıb. Ardınca Avstraliya təmsilçisi Tinka Eastonu da mübarizədən kənarlaşdıran xanım cüdoçumuz 1/4 finalda italiyalı Odette Qıuffrida ilə qarşılaşıb. Bu mərhələdə rəqibinə məğlub olan təmsilçimiz çıxışını təsəlliverici görüşdə davam etdirib. Təsəlliverici görüşdə monqolustanlı Uranzaya Bayanmunxa da uduzan Gültac Məmmədəliyeva medal qazanmaq şansını itirib.

Bu gün, həmçinin kişilər arasında -60 kq çəki dərəcəsində mübarizəyə başlayan cüdoçularımız da çıxışlarını medalsız başa vurublar. Turan Bayramov təsnifat, Nizami İmranov 1/16, Ruslan Paşayev isə 1/8 finalda rəqiblərinə məğlub olublar.

Xatırladaq ki, yarışın ilk günündə Azərbaycan millisinin üzvü Əhməd Yusifov (-60 kq) qızıl medal qazanıb. Bu, Azərbaycan cüdo tarixində böyüklər arasında dünya çempionatlarında qazanılan dördüncü qızıl medal, -60 kq çəki dərəcəsində isə ilk dünya çempionluğudur.

Dünya çempionatına oktyabrın 11-də yekun vurulacaq.