Bakıda keçiriləcək Formula-1 yarışlarının marşrutu dəqiqləşib
2016-cı ildə Azərbaycanda ilk dəfə Formula-1 üzrə Avropa Qran-pri yarışları keçiriləcək. Uzun sürən müzakirələrdən sonra həmin turnirin marşrutu müəyyənləşib.
Olimpnews.az xəbər verir ki, oktyabrın 7-də «Fairmont Baku» hotelində 2016-cı ildə Bakıda keçiriləcək Formula-1 üzrə Avropa Qran-pri yarışı ilə bağlı mətbuat konfransı keçirilib. Konfransda gənclər və idman naziri Azad Rəhimov, Formula-1 yarışının baş icraçı direktoru Berni Ekklestoun, Heydər Əliyev Fondunun icraçı direktoru, Azərbaycan Avtomobil İdman Növləri Federasiyasının prezidenti Anar Ələkbərov, «Tilke Engineering» şirkətinin baş icraçı direktoru Herman Tilke iştirak ediblər.
Azərbaycan gənclər və idman naziri Azad Rəhimov bildirib ki, bu turnir Formula-1 azarkeşlərinə böyük hədiyyədir. Ölkəmizdə Olimpiya idman növləri ilə yanaşı, milyonlarla azarkeşi və böyük maraq dairəsi olan qeyri-Olimpiya idman yarışları təşkil edilir. Avropa Qran-pri yarışları da bu tədbirlərin davamıdır. Azərbaycanda idmana dövlət qayğısından danışan Azad Rəhimov trekin müəyyənləşdirilməsi üçün geniş fikir mübadiləsinin aparıldığını diqqətə çatdırıb. Qeyd edib ki, turnirin keçirilməsi üçün yeni infrastruktur inşa olunmayacaq. Yarış Bakının mərkəzində keçiriləcək və paytaxtımızın gözəlliyi bütün dünyaya nümayiş olunacaq. Qran-pri yarışlarında birinci Avropa Oyunları üçün yaradılan infrastrukturdan istifadə ediləcək və Azadlıq meydanında müvəqqəti qurğular hazırlanacaq.
Azərbaycan Avtomobil Federasiyasının (AAF) prezidenti Anar Ələkbərov ölkəmizdə bu sahədə peşəkar idmançıların, mütəxəssislərin hazırlanmasının və yüksək standartlara cavab verən idman infrastrukturunun yaradılmasının vacibliyini vurğulayıb. Bildirib ki, AAF bunun üçün bütün imkanlarını səfərbər edib. "Biz avtomobil idmanı növləri, klassik avtomobillərin təqdim olunması, offroad yarışları və müxtəlif klublara dəstək verilməsi istiqamətində işlər görürük. Həmçinin nəqliyyatda təhlükəsizlik və nəqliyyat turizmi sahəsində layihələr həyata keçiririk” – deyə Anar Ələkbərov vurğulayıb.
Avropa Qran-pri yarışlarının Azərbaycanın idman tarixində əlamətdar hadisə olacağını diqqətə çatdıran AAF-ın prezidenti ilin sonunadək təşkil ediləcək tədbirlər barədə məlumat verib. Belə ki, oktyabrın 11-də "V1 Challenge Azerbaijan” yarışı və Almaniya şirkətləri ilə birgə klassik avtomobillərin sərgisi keçiriləcək. Avtomobil həvəskarları üçün yaxın zamanlarda Bakının yaxınlığında xüsusi ərazinin ayrılması nəzərdə tutulub. Burada müxtəlif avtomobil idman növləri üzrə baza, klassik avtomobillər muzeyi və azarkeşlərin istifadəsi üçün zonaların yaradılması planlaşdırılır.
"Formula-1 Group”un baş icraçı direktoru Berni Ekklestoun Bakıda olmasından məmnunluğunu ifadə edərək Avropa Qran-pri yarışlarının ölkəmizdə təşkilini yüksək qiymətləndirib. Qeyd edib ki, Bakı Şərq və Qərb mədəniyyətini özündə cəmləşdirən unikal şəhərdir. F1 yarışlarında şəhərin gözəlliyi, tarixi və coğrafiyası mühüm amil hesab olunur. "Biz də Bakının tarixini və gözəlliyini bütün dünyadakı F1 azarkeşlərinə nümayiş etdirmək qərarına gəldik. Ümid edirəm ki, yarış yüksək səviyyədə təşkil olunacaq və yerli azarkeşlər bundan böyük zövq alacaqlar” - deyə Berni Ekklestoun bildirib .
"Tilke” mühəndislik şirkətinin baş icraçı direktoru Herman Tilke Bakının F1 yarışları üçün əlverişli şəhər olduğunu və burada ən sürətli yarışın təşkil olunmasının mümkünlüyünü qeyd edib. Bildirib ki, Avropa Qran-pri yarışlarında marşrutun uzunluğu 6 min 6 metr və 8 sağ, 12 sol döngədən ibarətdir. Turnirdə orta sürət 210, maksimum sürət isə 340 kilometr/saatdır. Bu da ən sürətli yarışlar kateqoriyasına daxildir. Yarışın start və finişi Hökumət Evinin qarşısında olacaq. Trek Bakının tarixi məkanlarından, dəniz sahilindən keçməklə azarkeşlərdə xoş ovqat yaradacaq. Yarışları 25 mindən artıq tamaşaçının izləməsi üçün şərait yaradılacaq. Üç gün davam edəcək yarış zamanı tamaşaçı sayın artırılması da mümkündür.
Sonda KİV nümayəndələrinin sualları cavablandırılıb.
olimpnews.az
