Azərbaycan yığması 33 medalla 2-ci yerdədir

Bakı-2015 I Avropa Oyunlarının IX günündə 17 dəst medalın sahibi müəyyənləşib.

İyunun 20-də hesabına 3 medal əlavə edən Azərbaycan yığmasının aktivindəki medalların sayı 33-ə çatıb.

İlk 9 gündən sonra Azərbaycan 14 qızıl, 6 gümüş, 13 bürünc medalla komanda hesabında 2-ci pillədəki mövqeyini qoruyub. Siyahıya Rusiya liderlik edir. Bu gün daha 9 medal əldə edən şimal qonşularımız izləyiciləri ilə fərqi bir qədər də artırıb. Hesabında 59 mükafat olan rusiyalıların medallarından 29-u qızıl, 17-si gümüş, 13-ü bürüncdür. Üçüncü pillədə isə dəyişiklik olub. Bu gün aktivinə 2 qızıl, 2 gümüş, 1 bürünc medal yazdıran Almaniya komanda hesabında 3-cü sıraya yüksəlib. Günü medalsız başa vuran Macarıstan nəinki 3-cülüyü əldən verib, hətta 6-cı pilləyə enib.

Ən diqqətçəkən yüksəlişi İsveçrə edib. İsveçrə millisi 4 qızıl, 1 bürünc medal qazanaraq, 5-ci sıraya qədər irəliləyib. Bu gün medal qazanan ölkələrin sırasına daha biri qoşulub. Gimnastikada bir "qızıl" qazanan Sloveniya 38-ci medalçı komanda olub.

Qeyd edək ki, Bakı-2015 Avropa Oyunlarının ilk 9 günündə ümumilikdə 377 - 115 qızıl, 115 gümüş, 147 bürünc medalın sahibi müəyyənləşib. 38 ölkə təmsilçisi medal qazanıb ki, onlardan 23-ü çempionluq sevinci yaşayıb.

Yer Ölkə Qızıl Gümüş Bürünc Cəmi

1. Rusiya 29 17 13 59

2. AZƏRBAYCAN 14 6 13 33

3. Almaniya 8 9 9 26

4. Belarus 7 4 12 23

5. İsveçrə 7 4 2 13

6. Macarıstan 7 2 5 14

7. Serbiya 6 4 0 10

8. Böyük Britaniya 6 2 5 13

9. Türkiyə 5 3 15 23

10. İspaniya 4 7 5 16

11. Ukrayna 4 6 12 22