Bakıda Ümummilli Lider Heydər Əliyevin 100 illik yubileyinə həsr olunan cüdo üzrə Böyük Dəbilqə turnirinin açılış mərasimi keçirilib.
Milli Gimnastika Arenasında təşkil olunan mərasimdə gənclər və idman nazirinin müavini Mariana Vasileva, Azərbaycan Cüdo Federasiyasının prezidenti Rəşad Nəbiyev, Avropa Cüdo Birliyinin prezidenti Laslo Tot, həmçinin, digər rəsmi şəxslər iştirak ediblər. Əvvəlcə turnirlə bağlı hazırlanan videoçarx təqdim edilib.
Mərasimdə çıxış edən Mariana Vasileva ölkəmizdə idmana göstərilən diqət və qayğıdan danışıb. "Azərbaycan Cüdo Federasiyası öz işini mərahətlə görür. Artıq ölkənin regionlarında cüdo sürətlə inkişaf edir. Bakıdakı Böyük Dəbilqəyə də dünyanın 61 ölkəsinin idmançısı qatılıb. Onlara uğurlar arzulayıram”.
Daha sonra nitq bildirən Rəşad Nəbiyev turnirin Ulu Öndər Heydər Əliyevin 100 illiyinə həsr olunmasının onlar üçün xüsusi önəm kəsb etdiyini vurğulayıb: "Ulu Öndərin layiqli davamçısı olan Prezident İlham Əliyev Azərbaycanda idmanın inkişafında müstəsna rol oynayır. Biz də ölkəmizdə cüdonun inkişafı üçün əlimizdən gələni edirik. Bu il müxtəlif yaş qrupundan olan cüdoçularımız beynəlxalq yarışlarda uğurla çıxış ediblər”.
Laslo Tot isə fikirlərini bildirdikdən sonra yarışı açıq elan edib: "Mükəmməl təşkilatçılığa görə, Azərbaycan Cüdo Federasiyasına, həmçinin, Gənclər və İdman Nazirliyinə təşəkkürümü bildirirəm. Ümid edirəm ki, tədbir uğurla həyata keçiriləcək”.
Sonda Azərbaycan Dövlət Himni və Beynəlxalq Cüdo Federasiyasının himni səsləndirilib.
Qeyd edək ki, Böyük Dəbilqə turnirində 61 ölkənin 446 (264-ü kişi, 182-si qadın) idmançısı iştirak edir. Azərbaycan millisi yarışa 26 kişi, 7 qadın cüdoçu ilə qatılıb.
jpg-1714242793.jpg)
