Azərbaycan boksunun banisi Abbas Ağalarovun xatirəsinə həsr olunan gənclər arasında ənənəvi beynəlxalq turnirə start verilib. Döyüşlərdən öncə yarışın açılış mərasimi keçirilib.

Azərbaycan Boks Federasiyasından (ABF) verilən məlumata görə, tədbir iştirakçı komandaların – Azərbaycan, Rusiya, Özbəkistan, Qazaxıstan, Tacikistan və Səudiyyə Ərəbistanı yığmaları, həmçinin Litvanın “Royal” klubunun paradı ilə başlayıb.

Ardınca ABF prezidentinin müşaviri Samir Hüseynov çıxış edərək yarışın keçirilməsində əsas məqsədin boksun inkişafına töhfə vermək olduğunu bildirib. Gələn il Azərbaycan Boks Federasiyasının 100 illiyi ilə bağlı silsilə tədbirlər keçiriləcəyini söyləyən S. Hüseynov həmin vaxt Bakıya çoxsaylı qonaqlar gələcəyini və bunun boksun daha da inkişaf etməsində əhəmiyyətli rol oynayacağını vurğulayıb. O, yarışın yaddaqalan olacağına inamını ifadə edib.

Turnirin serbiyalı supervayzeri Draqolyub Radoviç və Azərbaycan Gənclər və İdman Nazirliyinin nümayəndəsi Əliniyaz Mirzəyev idmançılara uğurlar arzuladıqdan sonra turnir açıq elan olunub.

Yarışın ilk günündə 5 çəki dərəcəsində 14 döyüş təşkil olunub. Görüşlərdə Azərbaycan millisinin 3 boksçusu 1/4 finala vəsiqə qazanıb.

Qeyd edək ki, 97 boksçunun mübarizə apardığı yarışın ikinci günündə 15 görüş olacaq. Döyüşlər Bakı Boks Mərkəzində saat 15:00-da başlayacaq. Qaliblərin adına isə dekabrın 22-də aydınlıq gələcək.

1/8 final

48 kq

Bilalhəbəşi Nəzərov (Azərbaycan) – İbrahim Aljuhani (Səudiyyə Ərəbistanı) – ikinci döyüşə gəlməyib

57 kq

Davud Məmmədov (Azərbaycan) – Adam Macidov (Rusiya) – 1:4

Faiq Mollayev (Azərbaycan) – Maqomedrasul İbrahimov (Rusiya) – 1:4

63,5 kq

Vüsal Süleymanov (Azərbaycan) – Səid Yunusov (Özbəkistan) – birinci döyüşə gəlməyib

Janqir Aldaberqenov (Qazaxıstan) – Həsən Hacıyev (Azərbaycan) – birinci tam üstünlüklə qalib gəlib

Mehrab Abbasov (Azərbaycan) – Camşed Mahmadov (Tacikistan) – 5:0

Muhammed Miniqbayev (Tacikistan) – Mirhəsən İbrahimov (Azərbaycan) – 5:0

Ruslan Qafurov (Tacikistan) – Aliskandi Maqomedbekov (Rusiya) – birinci tam üstünlüklə qalib gəlib

Saken Yermek (Qazaxıstan) – Nurlan Paşayev (Azərbaycan) – birinci tam üstünlüklə qalib gəlib

Renat Krepştul (“Röyal” klubu, Litva) – Uğur Tağıyev (Azərbaycan) – 4:1

Məhəmmədəli Teymurov (Azərbaycan) – İbrahim Zeynalov (Azərbaycan) – ikinci tam üstünlüklə qalib gəlib

67 kq

Torexan Sabirxan (Qazaxıstan) – Məhəmməd Quliyev (Azərbaycan) – 5:0

Özcan Rəsulzadə (Azərbaycan) – Abdulla Çergesov (Rusiya) – 0:5

80 kq

Madiyar Behultanov (Qazaxıstan) – Təyyar Allahverdiyev (Azərbaycan) – birinci tam üstünlüklə qalib gəlib