Nazir Rəhimov: "Ağacan Abiyevin şərəfinə belə bir turnirin keçirilməsi çox təqdirəlayiqdir"

$Nazir Rəhimov: \"Ağacan Abiyevin şərəfinə belə bir turnirin keçirilməsi çox təqdirəlayiqdir\"$

Müsahibə

20.12.2025, 12:50

"Bakı şəhər Gənclər və İdman İdarəsinin Azərbaycan Boks Federasiyası ilə birgə təşkil etdiyi bu turnir yeniyetmə idmançılar üçün böyük əhəmiyyət kəsb edir".

Bu sözləri Olimpnews.az saytına müsahibəsində Milli Olimpiya Komitəsinin əməkdaşı, "Bədən tərbiyəsi və idman xadimi", beynəlxalq dərəcəli hakim Nazir Rəhimov bildirib.

O qeyd edib ki, noyabrın 24-də görkəmli idman xadimi Ağacan Abiyevin 88 yaşı tamam olub və həmin görüşdə onun şərəfinə boks turnirinin keçirilməsi qərara alınıb. Nazir Rəhimov bildirib ki, Ağacan Abiyev Abbas Ağalarovdan sonra Azərbaycanda boks idman növünün inkişafında misilsiz xidmətləri olan bir şəxsdir. "Ağacan Abiyev 28 il fasiləsiz olaraq Azərbaycan İdman Akademiyasının rektoru, 20 ildən artıq müddətdə Azərbaycan Boks Federasiyasının prezidenti olub. O, həmçinin AİBA və EABA-nın vitse-prezidenti kimi Azərbaycan və dünya boksunun inkişafına mühüm töhfələr verib. Uzun illər bu idman növünün bütün yükünü öz üzərinə götürüb. Ağacan Abiyevin şərəfinə belə bir turnirin keçirilməsi çox təqdirəlayiqdir. Yeniyetmələr arasında ilk dəfə təşkil olunan yarışda ümumilikdə 8 komanda iştirak etdi. Bakı, Sumqayıt və Gəncəni təmsil edən komandalar arasında kifayət qədər maraqlı və gərgin döyüşlər izlədik. Bir sıra xarici ölkələr də turnirə dəvət olunmamalarından narazılıqlarını bildiriblər. Qeyd edim ki, növbəti ildən etibarən bu turnir beynəlxalq status alacaq, dünya və Avropa ölkələrinin komandaları yarışda iştirak edəcəklər", - deyə Nazir Rəhimov bildirib.