Övladlarımızı hansı idman növünə cəlb edək ki...

Olimpizm xəbərləri

06.09.2022, 17:03

İstəyirsiniz ki, övladınız idmanla məşğul olsun? Lakin onlarda bu marağı oyada bilmirsiniz? Bunun üçün idman psixoloqlarının valideynlərə gördüyü məsləhətləri bir araya gətirməyə çalışdıq.

Uşaqları idmana necə həvəsləndirək?

Bu sual hər zaman valideynləri düşündürür. Görəsən, övladımın idmana marağı hansı səviyyədədir? Onu hansı idman növünə yazdırsam, nəticə faydasız olmaz?

Uşağın fiziki imkanlarını nəzərə almaq başlıca şərtdir. Onları idmana həvəsləndirmək üçün özümüzlə birlikdə idman zallarına, yarışların keçirildiyi arenalara aparmaq lazımdır. Fürsət düşdükdə televizor qarşısında idman verilişlərini, reportajlarını və filmləri birlikdə izləməliyik. Belə bir məqamda onların bizə ünvanladığı sualları dolğun cavablandırmalıyıq. Övladlarınızı idmana həvəsləndirməyin digər yollarından biri də onların oyuncaqlarının arasında idman ləvazimatlarının üstünlük təşkil etməsidir. Əgər uşaqlarımızın idmançı kimi və yaxud sağlam böyüməsini istəyiriksə, onların əşyaları arasında top, rolik, velosiped, üzgüçülük ləvazimatı, tennis raketkası yer almalıdır. Tədricən uşaq həddi-buluğa çatdıqdan sonra artıq özü bildirəcək ki, hansı idman növünə daha çox həvəs göstərir. Belə məqamda onların seçiminə qarşı, həssaslıq nümayiş etdirmək lazımdır. Qətiyyən onları həvəsdən salmaq və başqa seçim qarşısında qoymağa çalışmayın. Artıq onların seçim etdiyi idman növünə bir valideyn olaraq rəğbət göstərməyə çalışın. Hətta bu ürəyinizcə olmasa belə, hisslərinizi cilovlamağa çalışın. Ola bilər ki, övladınız məşq və yarışlar zamanı uğursuzluqla üz-üzə qalsın. Belə vəziyyətdə bir valideyn olaraq onları həvəsləndirməyə çalışın. Özünüzü elə göstərin ki, siz doğrudan da onların bu uğursuzluğunun təsadüf olduğuna inanırsınız. Bu övladınıza çox müsbət təsir edəcək və əmin olun ki, növbəti çıxışlarında onlar bu uğursuzluğu qələbə ilə əvəz edəcəklər.

Hansı idman növləri uşaqlar üçün məsləhətdir?

İdman növlərinin əksəriyyəti uşaqların fiziki cəhətdən sağlam böyüməsi üçün mütəxəssislər tərəfindən məsləhət görülür. İdmanla məşğul olan uşaq eyni zamanda, psixoloji gərginliyi daha tez dəf edə bilir. Uşaqları 3-5 yaşından etibarən idman növlərinə cəlb etmək olar. Bu yaş həddində onlar üzgüçülük, akrobatika, bədii gimnastika, cüdo, böyük tennis, stolüstü tennis, hokkey, futbol və digər idman növləri ilə məşğul ola bilərlər. Məhz bu idman növləri ilə məşğul olan uşaqlarda sinir sistemi, sümüklərin düzgün formalaşması, nəfəs almaq və qan dövranı normal şəkildə tənzimlənir. İdmanla məşğul olan uşaqların sürət reaksiyaları özünüidarə, fərqli xarakter və idarəçilik xüsusiyyətləri də formalaşır.

Onların daxilində

yüksək enerji var

Övladınızın fiziki imkanlarını sizdən yaxşı heç kim bilə bilməz. Əgər övladınız biraz şişmandırsa, onu fiziki gərginlik tələb edən idman növlərinə yazdırmayın. Onları əlbəyaxa döyüş növlərinə və güc tələb olunan idman növlərinə cəlb edin. Əgər uşaq fiziki cəhətdən bir qədər çəlimsiz və arıqdırsa onları gimnastika, atletika və futbol kimi sürət tələb edən idman növlərinə yönləndirin. Yekun nəticədə fiziki imkanları nəzərə almasaq belə, biz bir valideyn olaraq övladımızın sağlam orqanizimdə böyüməsinə nail olacağıq. Bir məsələni də qeyd edək ki, uşaqlar lap kiçik yaşlarından çevik və dəcəl olurlar. Bu da başa düşüləndir. Onların daxilində yüksək enerji var. Bu enerjini xəcləmədikcə onlar özlərini narahat hiss edir, xoşagəlməz hadisələrin səbəbkarı olurlar. Həmin enerjini idman və fiziki hərəkətlərə yönəltmək daha qənaətbəxşdir.

İdmanla məşğul olan övladınızın ilk azarkeşi

siz olun

Məşq və yarışlarda övladınızın çıxışlarını daha yaxından izləyin. Çalışın ki, məşqçi ilə birlikdə üçlük yarada biləsiniz. Belə olduğu təqdirdə siz övladınızın idmandakı uğurlarına daha böyük dəstək vermiş olacaqsınız. Məşqlərdən sonra məşqçidə müşahidə etdiyiniz müsbət xüsusiyyətləri övladınıza danışın. Bildirin ki, övladınızın böyük idmanda uğur qazanmasında sizinlə bərabər məşqçinin də rolu az olmayacaq. Hətta məşqçi övladınızla sərt davrandığı təqdirdə hadisələrə müdaxilə etməyin. Bir qədər səbrli olun. Əgər bunu etsəniz, övladınız ruhdan düşəcək, məşqçi isə ondan öz tövsiyyələrini əsirgəmiş olacaq. Bir sözlə, tərəfkeşliyi bir kənara qoymaq ən yaxşı addım olar.

"İdmançı çempion"un dəyişməyən

formulası

Artıq idmanda böyük uğurlara imza atan övladınızın yeni formulası formalaşıb. O, bir idmançı kimi çempionluğa doğru irəliləyir. Bundan əlavə o, qorxusuz böyüyür, peşəkarlığa gedən yolun astanasındadır. Hər gün yeni bir təcrübə ilə rastlaşan övladınız yaxşı ilə pisi ayırd edə bilir. Onun güclü olmasında ailənizin, dostlarının və məşqçisinin xüsusi rolu var. O, artıq psixoloji cəhətdən sağlam bir mühitdə formalaşır, pis vərdişləri özünə yaxın buraxmır. Ən əsası o, seçdiyi yoldan təəssüflənmir, əksinə bununla qürur duyur. Nəticədə o, gələcəkdə seçdiyi idman növü üzrə çempion ola biləcək ən yaxşı namizədlərdən biridir.

Anar Əhmədov