UFC Bakı gecəsinin bilet qiymətləri açıqlandı

Gündəm

15.05.2026, 12:13

Bakıda keçiriləcək “UFC Fight Night” turnirinə biletlərin satış qiymətləri açıqlanıb.

Mötəbər döyüş gecəsi iyunun 27-də Milli Gimnastika Arenasında baş tutacaq. iTicket platformasında yerləşdirilən məlumatda bildirilib ki, biletlərin qiyməti sektor və yerlərdən asılı olaraq 50 manatdan 2200 manatadək dəyişir.

“UFC Fight Night Baku” adı altında təşkil olunacaq turnirin saat 17:00-da start götürəcəyi, gecə saat 23:00-dək davam edəcəyi qeyd olunub. Yarış Azərbaycan MMA həvəskarlarına dünyanın tanınmış döyüşçülərinin qarşılaşmalarını arenadan canlı izləmək imkanı yaradacaq.

UFC-nin rəsmi saytında gecənin əsas döyüşü kimi azərbaycanlı Rafael Fiziyevlə Manuel Torres arasında keçiriləcək qarşılaşma təqdim olunub.

Yüngül çəki dərəcəsində çıxış edən digər təmsilçimiz Nazim Sadıxov isə Mateus Kamilo ilə üz-üzə gələcək. Karyerasında indiyədək 14 döyüş keçirən Nazim bunların 11-də qələbə qazanıb, iki dəfə məğlub olub.

Yarımorta çəkidə mübarizə aparan Fərman Həsənov UFC-də ilk sınağına çıxacaq. Azərbaycanlı döyüşçü debüt görüşündə amerikalı Erik Nolanla qarşılaşacaq. Qarışıq döyüş növlərində keçirdiyi beş görüşün hamısından qalib ayrılan Fərman məğlubiyyət üzü görməyib.